માણસાના આજોલ ગામમાંથી બોગસ ડોક્ટર ઝડપાયો

ડિગ્રી વગર દર્દીઓની સારવાર કરતો, ઈન્જેક્શન-દવાઓનો જથ્થો જપ્ત

ગાંધીનગર જિલ્લાના માણસા તાલુકાના આજોલ ગામમાં પોલીસ અને આરોગ્ય તંત્રએ સંયુકત કામગીરી કરી ખુલ્લે આમ ડિગ્રી વગર દર્દીઓના આરોગ્ય સાથે ચેડાં કરતો બોગસ તબીબને ઝડપી પાડ્યો છે. પોલીસે ઈન્જેક્શન-દવાઓનો જથ્થો જપ્ત કરી બોગસ ડોક્ટર સામે કાયદેસરની કાર્યવાહી હાથ ધરી છે.

ગાંધીનગર જિલ્લાના માણસા તાલુકાનાં આજોલ ગામે પાંચેક મહિનાથી ડિગ્રી વિના સતીષ પટેલ નામના બોગસ ડોક્ટરે ક્લિનિક ખોલીને એલોપેથી પ્રેક્ટિસ શરૂ કરી દીધી હતી. તેમ છતાં સ્થાનિક આરોગ્ય તંત્રને ગંધ શુદ્ધા આવી ન હતી. બોગસ ડોક્ટર પાંચ મહિનાથી ક્લિનિક ખોલીને દર્દીઓની સારવાર કરતો અને દવા પણ આપતો હતો. તેમજ દર્દીઓને ઈન્જેક્શન પણ આપતો હતો. જેનાં માટે તેણે દવા તેમજ ઈન્જેક્શન નો જથ્થો પણ ક્લિનિકમાં સ્ટોર કરી રાખ્યો હતો.

એક જાગૃત નાગરિકે તાલુકા અધિકારીને ફરિયાદ કરતાં રેડ પાડવામાં આવી હતી. જે અન્વયે બોગસ ડોક્ટર સતીષ પટેલ પાસે એલોપેથી પ્રેક્ટિસ માટેની માન્ય ડિગ્રી નહીં હોવાનું પ્રકાશમાં આવ્યું હતું.

આ ઉપરાંત મેડિકલ વેસ્ટ તેમજ સ્પિરિટ લાયસન્સ પણ નહીં હોવાની ફરિયાદ જાગૃત નાગરિકે કરી હતી. આરોગ્યની ટીમે તેની પાસે પ્રેક્ટિસ માટેનું સર્ટિફિકેટ સહિતના પુરાવા માંગ્યા હતા, પરંતુ સતીષ પટેલે કોઈ સર્ટિફિકેટ નહીં હોવાનું જણાવ્યું હતું. જેનાં પગલે આરોગ્યની ટીમે દવા તેમજ ઈન્જેક્શનનો જથ્થો જપ્ત કરી સ્થાનિક પોલીસ મથકમાં સતીષ પટેલ વિરુદ્ધ ગુનો પણ દાખલ કરાવ્યો હતો.

 33 ,  1 

Net Dakiya News © 2019, All Rights Reserved

ગુજરાતી