અમૂલ બાદ હવે મધર ડેરીએ દૂધના ભાવ વધાર્યા

નવો ભાવ વધારો આવતીકાલથી જ લાગુ

દેશમાં એક બાજુ કોરોના કાળમાં લોકો આર્થિક મુશ્કેલીનો સામનો કરી રહ્યા છે ત્યાં બીજી બાજુ મોંઘવારીનો માર સહન કરી રહેલી પ્રજા પર વધુ એક બોજનો વધારો થયો છે. પેટ્રોલ-ડીઝલમાં સતત વધી રહેલા ભાવ વચ્ચે હવે મધર ડેરીએ દિલ્હી-એનસીઆર તથા અન્ય શહેરોમાં દૂધની કિંમતમાં પ્રતિ લીટરે બે રૂપિયાનો વધારો કર્યો છે. આ નવો ભાવ વધારો આવતીકાલથી જ લાગુ થશે. આ અગાઉ કંપનીએ ડિસેમ્બર 2019માં અંતિમ વખત દૂધની કિંમત વધારી હતી. મધર ડેરી દિલ્હી-એનસીઆરમાં રોજનું 30 લાખ લીટરથી વધુ દૂધ વેચે છે.

હવે મધર ડેરીના એક લીટર ટોકન મિલ્કની કિંમત 42 રૂપિયાથી વધીને 44 રૂપિયા પ્રતિ લીટર પહોંચી છે. જ્યારે ફુલ ક્રીમ મિલ્કની કિંમત 55 રૂપિયાથી વધીને 57 રૂપિયા પ્રતિ લીટર પહોંચી છે. ગાયના દૂધનો ભાવ 47 રૂપિયાથી વધીને 49 રૂપિયા પ્રતિ લીટર થઈ છે.

મધર ડેરીએ તેના નિવેદનમાં જણાવ્યું, 11 જુલાઈ 2011થી દિલ્હી-એનસીઆરમાં દૂધની કિંમત પ્રતિ લીટર 2 રૂપિયા વધારવા મજબૂર છે. નવી કિંમત તમામ દૂધના ભાવ પર લાગુ થશે. કંપનીના ઈનપુટ ખર્ચમાં વધારો થઈ રહ્યો હોવાથી આ પગલું ભરવું પડ્યું છે. મધર ડેરીએ એમ પણ કહ્યું, છેલ્લા ત્રણ-ચાર સપ્તાહમાં માત્ર દૂધની કૃષિ કિંમતમાં લગભગ 4 ટકાનો વધારો થયો છે. છેલ્લા એક વર્ષમાં દૂધની ખરીદી માટે વધારે કિંમત ચૂકવવા છતાં ગ્રાહકો પર મહામારીમાં બોજ ન પડે તેને ધ્યાનમાં રાખી કિંમતમાં વધારો કરાયો નહોતો.

નોંધનીય છે કે, આ પહેલા અમૂલ કંપનીએ 1 જુલાઈથી દૂધની કિંમતમાં બે રૂપિયા પ્રતિ લીટર વધારો કર્યો હતો.

 59 ,  1