મુંબઈના મીરાં રોડ પર ચાલી રહેલ વેબસીરીઝ ફિક્સરના શુટિંગ દરમ્યાન કેટલાક અજાણ્યા શખ્સોએ દારૂ પીધેલી હાલતમાં ઘુસી આવી કલાકારો તેમજ ક્રૂ મેમ્બર્સ પર હુમલો કર્યો હોવાની ઘટના સામે આવી છે.
આ સમગ્ર ઘટનાનો એક વિડીયો દિગ્દર્શક તિગ્માંશુ ધુલિયા દ્વારા ટ્વીટર પર શેર કરવામાં આવ્યો છે. જે સોશ્યલ મીડિયા પર વાઈરલ થયો છે. તેમણે કેપ્શનમાં જણાવ્યું છે કે, “મીરાં રોડ પર જયારે આ હુમલો થયો ત્યારે હું સ્થળ પર હાજર હતો. અચાનક દારૂ પીધેલી હાલતમાં કેટલાક શખ્સોએ યુનિટ પર હુમલો કર્યો. કેમેરામેન સંતોષ થુદીયાલને 6 ટાંકા આવ્યા છે.” ટીવી નિર્માત્રી એકતા કપૂરે પણ આ વિડીયો ઈન્સ્ટાગ્રામ પર શેર કર્યો છે.
આ સાથે જ વિડીયોમાં માહી ગીલ અને અન્ય એક શખ્સ સાકેત સાહનીએ પણ ઘટના વિશે વિસ્તારથી જણાવતા કહ્યું કે અમે પરમીશન લઇ લીધી હતી અને સવારે 7 વાગ્યાથી અમે શૂટ કરી રહ્યા હતા પરંતુ સાંજે 4 વાગે અમુક શખ્સો લાકડી, સળિયા લઈને આવ્યા અને અમારા કલાકારોને મારવા લાગ્યા. હુમલાખોરોએ કહ્યું કે આ જગ્યા અમારી છે અને અમારી પરવાનગી વિના અહીં કોઈ શુટિંગ ન કરી શકે.
ઉલ્લેખનીય છે કે ટ્વીટર પર સમગ્ર ઘટનાની વિગતો જોઈ મુંબઈ પોલીસે તેમને રીપ્લાય કર્યો અને ફરિયાદ થાણે રૂરલ પોલીસ સ્ટેશનમાં ફોરવર્ડ કરવામાં આવી છે તેમ જણાવ્યું. આ સાથે જ પોલીસે આ મામલે 7 લોકોની અટકાયત પણ કરી છે. ફિલ્મની ટીમ આ મામલે મહારાષ્ટ્રના મુખ્યમંત્રી ફડનવીસને પણ મળવા જશે.
37 , 1
