ઉમેદવારી પરત ખેંચ્યા બાદ કોંગ્રેસના મહિલા નેતા ધ્રુસ્કે ધ્રુસ્કે રડી પડ્યા

જ્યોતિ સોજીત્રાએ ફોર્મ પરત ખેંચ્યું, કહ્યું- કોંગ્રેસે મારી કારકિર્દી પૂરી કરી નાંખી

સુરતમાં પાસ અને કોંગ્રેસ વચ્ચેનો વિવાદ વધુને વધુ વકરી રહ્યો છે. ઉપરાઉપરી રાજીનામા પડી રહ્યાં છે. પાસ અને કોંગ્રેસ વચ્ચેની લડાઈને કોંગ્રેસને જ ફટકો પડી રહ્યો છે. સુરતના વોર્ડ નંબર 3ના ઉમેદવાર કાંતિ ભરવાડ અને જ્યોતિ સોજિત્રા ફોર્મ પરત ખેંચવા પહોંચ્યા છે. વોર્ડ નંબર 3 પાટીદાર વિસ્તાર ગણાય છે. ગત ચૂંટણીમાં પાટીદાર મત કોંગ્રેસને મળતા કોંગ્રેસને મોટા ફાયદો થયો હતો. પરંતુ હાલ પાસના નેતાઓ વિફરતા કોંગ્રેસે આ મોટો ફટકો કહી શકાય. પાટીદારો સામેના વાકયુદ્ધમાં સીધું નુકસાન કોંગ્રેસનું જ છે. 

સુરતમાં PAAS સમર્થિત કોંગ્રેસના ઉમેદવારોએ ફોર્મ પરત આપવાની શરૂઆત કરી દીધી છે. વોર્ડ નંબર ત્રણના કોંગ્રેસના ઉમેદવાર ફોર્મ પરત ખેંચવા પહોંચ્યા છે. જ્યોતિ સોજિત્રા અને કાંતિ ભરવાડ પોતાનું ઉમેદવારી ફોર્મ પરત ખેંચવા માટે પહોંચતા કોંગ્રેસને ફટકો પડવાની શરૂઆત થઈ ગઈ છે. વોર્ડ નંબર ત્રણથી જેને મેન્ડેટ બદલીને ટિકિટ આપી હતી તેવા કાનજી અલગોદરે પણ ફોર્મ પરત ખેંચ્યું છે. PAASના આગેવાનોમાં ટિકિટ મામલે અસંતોષ થતા ધાર્મિક માલવિયા અને અલ્પેશ કથીરિયાએ કોંગ્રેસ સામે બંડ પોકાર્યું હતું. અલ્પેશે દાવો કર્યો હતો કે, તેમની સાથે રહેલા અને કોંગ્રેસમાંથી જેમણે દાવેદારી કરી છે તેવા લોકો ફોર્મ પરત ખેંચી લેશે. જેની શરૂઆત આખરે થઈ ગઈ છે. ત્રણ દિવસના નાટકીય ઘટનાક્રમ બાદ રાજીનામાની શરૂઆત થઈ ગઈ છે.

આજે બપોરે જ્યોતિબેન સોજીત્રા તેમના પતિ સાથે સૂડા ભવન ખાતે પહોંચ્યા હતા. ઉમેદવારી પરત ખેંચે તે પહેલા કોંગ્રેસના નેતાઓ મનાવવા પહોંચી ગયા હતા. આ સમયે જ્યોતિબેન ધ્રુસ્કે ને ધ્રુસ્કે રડી પડ્યા હતા. તેમજ મીડિયા સામે જ કોંગ્રેસ પર આકરા પ્રહારો કર્યા હતા અને જણાવ્યું હતું કે, કોંગ્રેસે મારી કારકિર્દી પૂરી કરી નાંખી. મારો વોર્ડ ખાલીખમ કરીને મને હોળીનું નાળિયેર બનાવી અમારું બલિદાન લેવાઇ ગયું. મારે બીજું પાર્ટીને કંઈ નથી કહેવું. મારી પાર્ટીને હું હાથ જોડું છું. મને 20 વર્ષ સુધી તક આપવા માટે.

આ સમયે જ્યોતિ સોજીત્રાએ પૂર્વ કેન્દ્રીય મંત્રી તુષાર ચૌધરી અને શહેર કોંગ્રેસ પ્રમુખ પર પણ આક્ષેપો લગાવ્યા હતા. નોંધનીય છે કે, પોતાના સમર્થકોને ટિકિટ ન મળતા પાસના નેતા ધાર્મિક માલવિયાએ ટિકિટ મળી હોવા છતા કોંગ્રેસની ઉમેદવારી નોંધાવી નહોતી. આ પછી પાસ દ્વારા 12 કોંગ્રેસના ઉમેદવારો સમર્થનમાં ઉમેદવારી પાછી ખેંચવાનો દાવો કર્યો હતો. જોકે, પોકળ સાબિત થયો છે.

 31 ,  1