સુરેન્દ્રનગર : દલિત શિક્ષક ગામમાં ઘર ના મળતાં રોજ 150 કિમી અપડાઉન કરવા મજબૂર

ફરિયાદને આધારે ચાલી રહી છે તપાસ – મંત્રી પ્રદિપ પરમાર

રાજ્યમાં વધુ એક ભેદભાવનો મામલો સામે આવ્યો છે. સુરેન્દ્રનગર જિલ્લાના દલિત સમાજના શિક્ષકને કડવો અનુભવ થયો છે. જેમાં 150 કિલોમીટર અંતરે શાળા આવેલી છે. જો કે દલિત હોવાથી ગામમાં ઘર ન મળતા રોજ અપડાઉન કરે છે. ત્યારે આ મામલે કેબિનેટ મંત્રી પ્રદિપ પરમારે ઘટનાને ગંભીરતાથી લઇ કાર્યવાહીના આદેશ આપ્યા છે.

ગુજરાતના સુરેન્દ્રનગર જિલ્લાની એક સરકારી સ્કૂલમાં ભણાવતા 50 વર્ષીય શિક્ષકને દરરોજ 150 કિલોમીટર અંતર કાપીને ઘરેથી સ્કૂલ આવવું-જવું પડે છે. જેનું કારણ છે કે, આ શિક્ષક શિડ્યુલ કાસ્ટ (SC) હેઠળ આવતાં વાલ્મિકી સમાજમાંથી આવે છે. જે ગામમાં આ શિક્ષક નોકરી કરે છે ત્યાંની પંચાયતે સત્તાવાર રીતે કહી દીધું છે કે, તેમને અહીં ઘર નહીં મળે કારણકે ગામમાં વાલ્મિકી સમાજની વસાહત નથી.

શિક્ષક સાથે થઈ રહેલા આ દેખીતા અન્યાયને પગલે રાજ્યના સામાજિક ન્યાય અને અધિકારીતા વિભાગને ગત અઠવાડિયે શિક્ષણ વિભાગને પત્ર લખવાની ફરજ પડી હતી. તેમણે પત્રમાં લખ્યું, “શિડ્યુલ કાસ્ટના શિક્ષક ત્રાસ, ભેદભાવ, અસામનતા અને જાતિવાદનો ભોગ બન્યા છે.” સામાજિક ન્યાય અને અધિકારીતા વિભાગે ત્વરિતપણે આ શિક્ષકની બદલી કરવાની માગ કરી છે. આ પત્રની નકલ અમારા સહયોગી અખબાર ટાઈમ્સ ઓફ ઈન્ડિયા પાસે પણ છે.

50 વર્ષીય કનૈયાલાલ બારૈયા સુરેન્દ્રનગર જિલ્લાના ચુડા તાલુકાના છાત્રાળા ગામના રહેવાસી છે. તેમને આ જ જિલ્લામાં આવેલી નિનામા સ્કૂલમાં ટ્રાન્સફર અપાઈ હતી, જે 75 કિમી દૂર આવેલી છે. “હું શાળામાં હાજર થયો પછી મેં ગામમાં ભાડે ઘર શોધવા માટેની કવાયત શરૂ કરી હતી. હું કયા સમાજમાંથી આવું છું તેવો પ્રશ્ન કરાયો હતો. મેં કહ્યું કે, હું વાલ્મિકી સમાજનો છું ત્યારે મને કહેવામાં આવ્યું કે, વાલ્મિકી સમાજના મકાનો અહીં નથી માટે તમને ગામમાં ઘર ભાડે નહીં મળે”, તેમ કનૈયાલાલે જણાવ્યું.

ગામના સરપંચ અને તલાટીએ પણ ગ્રામપંચાયતના લેટરહેડ પર 16 ડિસેમ્બર 2020ના રોજ કનૈયાલાલને આ વાત લખીને આપી હતી. કનૈયાલાલે અમારા સહયોગી અખબાર ટાઈમ્સ ઓફ ઈન્ડિયાને જણાવ્યું, “મેં સામાજિક ન્યાય, શિક્ષણ વિભાગ સહિતના તમામ લાગતાવળગતા વિભાગને આ અંગે ફરિયાદ કરી હતી. આખરે ગત અઠવાડિયે સામાજિક ન્યાય વિભાગે શિક્ષણ વિભાગને મારી બદલી કરવા માટે પત્ર લખ્યો હતો.”

કનૈયાલાલનો દાવો છે કે તેમણે પોતાની સ્થિતિ રાજ્યના મુખ્યમંત્રી ભૂપેન્દ્ર પટેલને પણ જણાવી છે અને બદલી કરી આપવા માટે વિનંતી કરી છે. “મુખ્યમંત્રીએ મને કહ્યું કે, તેઓ આ દિશામાં પગલાં લેશે”, તેમ કનૈયાલાલે ઉમેર્યું.

સુરેન્દ્રનગરના જિલ્લા કલેક્ટર અમૃતેશ ઔરંગાબાદકરનો પણ અમારા સહયોગી અખબારે સંપર્ક કર્યો હતો. ત્યારે તેમણે કહ્યું હતું કે, તેઓ હાલ રજા પર છે અને આ મામલે તપાસ કરશે.

દલિત એક્ટિવિસ્ટના મતાનુસાર, જ્ઞાતિના આધારે ભેદભાવ સામાન્ય છે પરંતુ શિક્ષકોને પણ આમાંથી બાકાત નથી રાખવામાં આવતા તે કમનસીબી છે. “મેં વડાપ્રધાન નરેન્દ્ર મોદીને પત્ર લખીને વિનંતી કરી છે કે, તેઓ 26 જાન્યુઆરી 2022 સુધીમાં એક ગામને ભેદભાવ મુક્ત હોવાનું જાહેર કરે. આવા કિસ્સા ગુજરાતમાં દરેક સ્થળે રોજેરોજ બનતા હોય છે”, તેમ દલિતોના અધિકાર માટે લડતાં કાંતિલાલ પરમારે જણાવ્યું.

ફરિયાદ બાદ મારા અધિકારીઓને કામે લગાવ્યા – પ્રદિપ પરમારે

સામાજિક ન્યાય મંત્રી પ્રદિપ પરમારે જણાવ્યું હતું કે પીડિત કનૈયાલાલ બારૈયાનો મારા પર ફોન આવ્યો હતો. મેં અગાઉ તેમની સાથે 10થી 12 વખત વાત કરી હતી. ફરિયાદ બાદ મેં મારા અધિકારીઓને કામે લગાવ્યા છે. આ બાબતે શિક્ષણમંત્રીને પણ જાણ કરી પીડિતની યોગ્ય જગ્યાએ બદલી કરવાની વાત કરી હતી.

 47 ,  1 

Net Dakiya News © 2019, All Rights Reserved

ગુજરાતી