અજબ-ગજબ : 35 લાખનો દારૂ ઉંદરડા પી ગયા…!

એટાના કોતવાલી પોલીસસ્ટેનમાંથી 1459 પેટીઓ ગાયબ

પોલીસ સ્ટેશનમાંથી દારુની બાટલીઓ ભરેલા 1400 કાર્ટૂન ગુમ થઈ જવાના મામલે સ્ટેશનના સ્ટાફે એવું બહાનું કાઢ્યું છે કે તેને સાંભળી ઉચ્ચ અધિકારીઓ પણ માથું ખંજવાળી રહ્યા છે. આ ઘટના યુપીના એટાના કોતવાલી પોલીસ સ્ટેશનની છે. 35 લાખ રુપિયાનો દારુ રાતોરાત ગુમ થઈ જતાં હવે તેનો પત્તો લગાવવા IPS સ્તરના એક અધિકારીને તપાસ સોંપવામાં આવી છે. એક અખબારના એહવાલ મુજબ, પોલીસ સ્ટેશનના સ્ટ્રોંગ રુમમાં રાખવામાં આવેલી દારુની પેટીઓને ઉંદર કોતરી ગયા હોવાનો દાવો કરવામાં આવી રહ્યો છે. દારુ પ્લાસ્ટિકના કેનમાં ભરેલો હતો, જેને પણ ઉંદરોએ કોતરી નાખી હતી અને કાચની બોટલોને પણ ઉંદરોએ જ ફોડી નાખી હતી.

આ પોલીસ સ્ટેશનમાં દારુની 1459 પેટીઓ પડી હતી, જેનું મૂલ્ય 35 લાખ રુપિયા જેટલું થાય છે. શું દારુનો આટલો મોટો જથ્થો ઉંદરોને લીધે ગાયબ થઈ શકે? સ્ટાફ દ્વારા કરવામાં આવેલા દાવા શંકાસ્પદની સાથે હાસ્યાસ્પદ પણ લાગતા આગ્રા ઝોનના એડીજી રાજીવ ક્રિશઅનાએ અલીગઢના આઈપીએસ વિકાસ સિંઘને આ મામલે ઉંડાણપૂર્વક તપાસ કરવા આદેશ આપ્યો છે.
પ્રાથમિક તપાસમાં બહાર આવેલી વિગતો અનુસાર, જે દારુ ઉંદર પી ગયા હોવાના દાવા પોલીસ સ્ટેશનનો સ્ટાફ કરી રહ્યો છે, તે ખરેખર તો એક ગેંગસ્ટરને વેચી મારવામાં આવ્યો હતો. આ ગેંગસ્ટરનું નામ બંટુ યાદવ છે, જે શુક્રવારે જ એક કેસમાં પકડાયો હતો. આ કેસમાં પોલીસ સ્ટેશનના મુખ્ય અધિકારી પણ આરોપી છે, અને હાલ તેઓ ફરાર છે.

12 માર્ચના રોજ આ પોલીસ સ્ટેશનના સ્ટ્રોંગરુમની જિલ્લા મેજિસ્ટ્રેટ વીભા ચહલ અને સિનિયર એસપી સુનિલ કુમારે ઓચિંતી મુલાકાત લીધી હતી. જેમાં જાણવા મળ્યું હતું કે તેમાં રખાયેલી 1459 દારુની પેટીઓ ગાયબ છે. જેની નોંધ લેતા સ્ટેશનના ઓફિસર અને હેડ ક્લાર્કને સમન્સ પાઠવવામાં આવ્યું હતું, પરંતુ બંનેમાંથી એકેય ખુલાસો કરવા ગયા જ નહોતા.

આખરે જિલ્લા મેજિસ્ટ્રેટે આ મામલે ફરિયાદ દાખલ કરવાનો આદેશ આપતા તેની તપાસ શરુ થઈ હતી. જેમાં એવું બહાર આવ્યું હતું કે, પોલીસ સ્ટેશનમાં પડેલો 35 લાખ રુપિયાનો દારુ સ્ટાફ દ્વારા એક સ્થાનિક ગુંડાને વેચી મારવામાં આવ્યો હતો. આગ્રા જિલ્લામાં જ થોડા દિવસ અગાઉ બે પોલીસ કોન્સ્ટેબલો પાસેથી એક ઢાબાવાળાએ ભોજનનું બિલ માગતા પોલીસે તેને લૂંટના ખોટા કેસમાં ફિટ કરી દીધો હતો. જેમાં સ્થાનિક ગુંડા બંટુ યાદવે પોલીસની મદદ કરી હતી.

 19 ,  1