September 19, 2021
September 19, 2021

હિન્દુવાદી તરફ કોંગ્રેસનો વધી રહ્યો છે ઝુકાવ…

રાહુલે વૈષ્ણોદૈવીની મુલાકાત લઇને સંદેશો આપ્યો – અમે પણ હિન્દુ છીએ

કોંગ્રેસ નેતા રાહુલ ગાંધી ફરી એકવાર મંદિર દર્શન શરૂ કર્યા છે. તેમણે હમણાં જ જાણીતા યાત્રાધામ વૈષ્ણોદૈવી માતાના દર્શન કર્યા છે. તેમણે 13થી 14 કિલોમીટરનું અંતર પગે ચાલીને જય માતા દીના નારાઓની વચ્ચે યાત્રાઓ કરી અને તેના વીડિયો વાયરલ થયા છે.રાજકીય નિરીક્ષકોના મતે રાહુલ અને પ્રિયંકા ગાંધી કોંગ્રેસની લઘુમતીઓ તરફી છાપને દુર કરવા અને કોંગ્રેસ હિન્દુવાદી છે તે પૂરવાર કરવા છેલ્લા ઘણા સમયથી વિવિધ મંદિરોની મુલાકાત લઇ રહ્યા છે. રાહુલની આ મુલાકાત યુપીની ચૂંટણીઓના સંદર્ભમાં જોવામાં આવી રહી છે.

જમ્મુ કાશ્મીર પહોંચેલા રાહુલ ગાંધીએ શુક્રવારે પાર્ટી કાર્યકરોને સંબોધિત કર્યા હતા. મંચ ઉપરથી રાહુલ ગાંધીએ કાર્યકરો પાસે ‘જય માતા દી’ના નારા લગાવડાવ્યા હતા. જમ્મુ શહેરમાં યોજાયેલા કાર્યક્રમમાં કોંગ્રેસના નેતા મંચ પર હાજર હતા. રાહુલ ગાંધીએ પહેલા જય માતા દી કહ્યું ત્યારે પાર્ટી કાર્યકરો તરફથી કોઈ જવાબ મળ્યો નહતો. બાદમાં રાહુલે જણાવ્યું કે, બોલો…ત્યારે પાર્ટી કાર્યકરોએ સૂર પુરાવ્યો હતો. રાહુલ ગાંધીએ જણાવ્યું કે હું એક કાશ્મીરી પંડિત છું. મારો પરિવાર કાશ્મીરી પંડિત છે. કાશ્મીરી પંડિતોનું એક પ્રતિનિધિ મંડળ મને મળ્યું અને તેમણે મને કહ્યું કે, કોંગ્રેસે તેમના માટે ઘણી સારી કલ્યાણ યોનજાઓ ચલાવી હતી પરંતુ ભાજપે કંઈ જ કર્યું નથી. હું મારા કાશ્મીરી પંડિત ભાઈ-બહેનોને વચન આપુ છું કે હું તેમના માટે કંઈક કરીશ.

અગાઉ રાહુલ ગાંધીએ ગુરુવારે કટરાથી વૈષ્ણો દેવી સુધી પગપાળા યાત્રા કરી હતી. તેમની સાથે અનેક શ્રદ્ધાળુઓ પણ હાજર હતા. રાહુલ ગાંધી સાથે તેના સુરક્ષાકર્મીઓ પણ હાજર હતા. જ્યારે મીડિયાએ તેમની પાસેથી પ્રતિક્રિયા માંગવા પ્રયાસ કર્યો હતો ત્યારે રાહુલ ગાંધીએ જણાવ્યું હતું કે હું અહીં માતાની પૂજા કરવા આવ્યો છું. હું કોઈપણ રાજકીય વાત નથી કરવા ઈચ્છતો. રાહુલ ગાંધી વૈષ્ણો દેવામાં શ્રદ્ધાળુઓ સાથે વાતચીત કરતા પણ નજરે પડ્યા હતા. ઓગસ્ટ 2019માં કેન્દ્રની મોદી સરકારે જમ્મુ-કાશ્મીરમાંથી કલમ 370 નાબૂદ કરી હતી. ત્યારબાદ રાહુલ ગાંધીની આ બીજી જમ્મુ-કાશ્મીર મુલાકાત છે.

કોંગ્રેસના નેતા રાહુલ ગાંધીએ શુક્રવારે આરોપ લગાવ્યો કે ભારતીય જનતા પાર્ટી- રાષ્ટ્રીય સ્વયં સેવક સંઘ જમ્મુ કાશ્મીરની સંસ્કૃતિને નષ્ટ કરવાનો પ્રયાસ કરે છે. રાહુલ ગાંધીએ કોંગ્રેસના બે દિવસા કાર્યક્રમમાં પાર્ટી કાર્યકરો, પદાધિકારીઓને સંબોધન કરતા જણાવ્યું કે, તમારા બધામાં પ્રેમ, ભાઈચારો અને હળીમળીને રહેવાની સંસ્કૃતિની ભાવના છે. મને દુખ છે કે ભાજપ અને આરએસએસ આ સંસ્કૃતિને નષ્ટ કરવા પ્રયાસ કરી રહ્યા છે.
 
કોંગ્રેસના પૂર્વ અધ્યક્ષે જણાવ્યું કે, તેઓ (ભાજપ-આરએસએસ) પ્રેમ અને ભાઈચારા પર હુમલો કરે છે..તમને નબળા બનાવ્યા અને પરિણામે તમારા રાજ્યનો દરજ્જો છીનવી લીધો. કેન્દ્રમાં ભાજપના નેતૃત્વ હેઠળની સરકાર આસએસએસમાંથી પ્રેરણા લઈ રહી છે.

 43 ,  1