મોતનો મલાજો ન જળવાયો! ફાટેલી PPE કિટમાં લોહી નીતરતો મૃતદેહ સ્મશાને મોકલ્યો

પોલીસ અને ડોક્ટરોની સમજાવટ બાદ પરિવારજનોએ અંતિમવિધિ કરી

રાજકોટમાં માનવતા મરી પરવારી હોય તેવો કિસ્સો સામે આવ્યો છે. અમરેલીનાં એક ખેડૂતને કોરોના પોઝીટિવ રિપોર્ટ આવતા રાજકોટ ખાનગી હોસ્પિટલમાં સારવાર માટે ખસેડવામાં આવ્યા હતા. જોકે સારવાર દરમિયાન ખેડૂતનું મોત થતા હોસ્પિટલે 1.10 લાખ રૂપિયા ખંખેરી લીધા હતા. બાદમાં ફાટેલી પીપીઇ કીટમાં મૃતદેહને બંધ કરી લોહીથી નિતરતો મૃતદેહ સ્મશાન ખાતે મોકલ્યો હોવાની અમાનવીય ઘટના સામે આવી છે. 

કોરોનાગ્રસ્ત ખેડૂતપુત્ર પાસેથી રૂપિયા 1.11 લાખ વસૂલ્યા બાદ પણ ખેડૂત સાજા ન થયા અને અનંતની વાટ પકડી હતી. ક્રાઇસ્ટ હોસ્પિટલની બેદરકારીને કારણે તેના મૃતદેહને પણ ફાટેલી PPE કિટમાં લઇ જવામાં આવ્યો હતો. રાજકોટના 80 ફૂટ રોડ પર આવેલા બાપુનગર સ્મશાનગૃહ ખાતે સ્વજનો મૃતદેહના અંતિમસંસ્કાર માટે પહોંચ્યા હતા. ત્યારે શબવાહિનીમાંથી મૃતદેહ બહાર લેતા સમયે લોહી નીતરતી હાલતમાં મૃતદેહ જોઇ પરિવારજનોમાં રોષ જોવા મળ્યો હતો. જોકે પોલીસ અને તબીબોની સમજાવટ બાદ મૃતદેહના અંતિમસંસ્કાર કરવામાં આવ્યા હતા.

અમરેલી નજીકના ચાંપાથળ ગામના મૃતક ખેડૂત રસિકભાઇ વધાસિયાનાં પુત્ર મુકેશભાઈએ જણાવ્યું હતું કે, સારવાર માટે હોસ્પિટલ દ્વારા અમારી પાસેથી 1.11 લાખની ફી તબક્કાવાર લેવામાં આવી હતી. મારા પિતાના મૃત્યુની સવારે 9.30 વાગે જાણ કરાઈ હતી. જેના બાદ બપોરે લાશ સોંપવામાં આવી હતી. જેમાં તેમના મૃતદેહના કાન અને નાકમાંથી સતત લોહી વહી રહ્યું હતું. ભારે હોબાળો થતા અંતે પોલીસ બોલાવવામાં આવી હતી. 

આ અંગે ભક્તિનગર પોલીસ મથકના પી.આઇ જે. ડી. ઝાલાએ જણાવ્યું હતું કે, મૃતકને નાકમાં ઓક્સિજન નળી મૂકવામાં આવી હતી અને લોહી પાતળું કરવા દવા આપવામાં આવી હતી. જેમાં નળી બહાર કાઢ્યા બાદ નાકમાંથી લોહી નીકળ્યાનું તારણ સામે આવ્યું છે. સમજાવટ બાદ પરિવારજનોએ આખરે મૃતદેહના અંતિમ સંસ્કાર કર્યા હતા.

હોસ્પિટલવાળાએ સમજાવ્યું કે ઓક્સિજનની નળી કાઢી એટલે લોહી નીકળે છે. પરંતુ મૃતદેહમાંથી લોહી કંઇ રીતે નીકળી શકે. આ વાત પરિવારજનોને ગળે ઊતરે એવી નથી. કોરોના રિપોર્ટ પોઝિટિવ આવતાં વધુ સારવાર માટે રાજકોટ હોસ્પિટલ લાવ્યા હતા જોકે 1.11 લાખ હોસ્પિટલને ચૂકવ્યા પણ હોસ્પિટલ તેમને બચાવી શકી નહીં.

 33 ,  1