માચિસ રે માચિસ તારો પણ ભાવ વધ્યો…

પેટ્રોલ-ડીઝલ સહિત હવે માચિસ પણ થઇ મોંઘી…

અત્યાર સુધી વધતી જતી મોંઘવારીમાં પેટ્રોલ-ડીઝલ સહિત દરેક ચીજ-વસ્તુઓના ભાવો વધી રહ્યા છે. પરંતુ ગરીબથી લઇને ધનિક વર્ગ માટે અનિવાર્ય એવી સાવ સામાન્ય ચીજ માચિસના ભાવ પ્રત્યે કોઇનું ધ્યાન ગયું નહતું. હવે ધ્યાન એટલા માટે ગયું છે, કેમકે, એક રૂપિયામાં મળતી માચિસના ભાવમાં 100 ટકાનો વધારો થઇને બે રૂપિયા થઇ ગયો છે.

અત્યાર સુધી તમે એક રુપિયામાં માચિસનું બોક્સ ખરીદતા હતા, પરંતુ ચૌદ વર્ષ પછી તેની કિંમતમાં પણ વધારો થવાનો છે. માચિસ બનાવતી પાંચ મોટી કંપનીઓના અધિકારીઓએ સર્વસંમતિથી નિર્ણય લીધો છે કે પહેલી ડિસેમ્બરથી માચિસની કિંમતમાં એક રુપિયાનો વધારો કરવામાં આવશે. માટે હવે માચિસનું બોક્સ એક નહીં પણ બે રુપિયામાં મળશે. ઉલ્લેખનીય છે કે વર્ષ 2007માં માચિસની કિંમતમાં 50 પૈસાનો વધારો કરવામાં આવ્યો હતો.

ગુરુવારના રોજ સિવાકાસી ખાતે ઓલ ઈન્ડિયા ચેમ્બર ઓફ માચિસની મીટિંગ દરમિયાન આ નિર્ણય લેવામાં આવ્યો હતો. ઈન્ડસ્ટ્રી સાથે જોડાયેલા લોકોએ જણાવ્યું કે, તાજેતરમાં માચિસના ઉત્પાદન માટે ઉપયોગમાં લેવામાં આવતા કાચા માલની કિંમતમાં વધારો થવાને કારણે ભાવવધારાનો નિર્ણય લેવામાં આવ્યો છે. ઉત્પાદકોનું કહેવું છે કે, માચિસ તૈયાર કરવા માટે 14 પ્રકારના કાચા માલની જરુર પડે છે. રેડ ફોસ્ફરસની કિંમત 425 રુપિયા પ્રતિ કિલોથી વધીને 810 રુપિયા પ્રતિ કિલો થઈ ગઈ છે. વેક્સની કિંમત 58થી વધીને 80, બોક્સના બહારના ભાગની કિંમત 36થી વધીને 55, ઈનર બોક્સ બોર્ડની કિંમત 32થી વધીને 58 થઈ ગઈ છે. પેપર, પોટેશિયમ ક્લોરેટ અને સલ્ફરના ભાવમાં પણ 10મી ઓક્ટોબરથી વધારો થયો છે. આ સિવાય ડીઝલની કિંમતોમાં થઈ રહેલા વધારાને કારણે પણ ઉત્પાદનનો ખર્ચ ઘણો વધી ગયો છે.

નેશનલ સ્મોલ મેચબોક્સ મેન્યુફેક્ચરર્સ અસોસિએશનના સેક્રેટરી વી.એસ.સેતુરાથીનમે અમારા સહયોગી ટાઈમ્સ ઓફ ઈન્ડિયાને જણાવ્યું કે, ઉત્પાદકો અત્યારે માચિસના 600 બોક્સનું એક બન્ડલ 270થી 300 રુપિયામાં વેચે છે. એક બોક્સમાં 50 સળીઓ હોય છે. અમે વેચાણ કિંમતમાં લગભગ 60 ટકા વધારો કરવાનો નિર્ણય લીધો છે. જેનાથી એક બંડલની કિંમત 430-480 રુપિયા થઈ જશે. આમાં ટ્રાન્સપોર્ટેશન અને જીએસટી ઉમેરવામાં નથી આવ્યા.

 22 ,  1 

Net Dakiya News © 2019, All Rights Reserved

ગુજરાતી