ઓત્તારી..520 કરોડના કૌભાંડમાં નાસ્તાની લારીવાળો પણ પકડાયો..!

સુરતમાંથી બે લોકો પકડાયા અન્ય એક ટ્રાવેલ એજન્ટ છે..

ચાઈનીઝ એપ્સ દ્વારા લોન આપી કરોડો રુપિયાના કૌભાંડનો ભાંડો ફુટ્યાને હજુ ગણતરીનો સમય થયો છે, ત્યારે રુપિયા ડબલ કરવાના આવા જ એક કાંડમાં પોલીસે સુરતમાંથી બેને ઉઠાવ્યા છે. જેમાંથી એક આરોપી વેસુમાં ચા-નાસ્તાની લારી ચલાવે છે, જ્યારે બીજો ટુર્સ એન્ડ ટ્રાવેલ એજન્ટ તરીકે કામ કરે છે. આ બંને આરોપીને બેંગલોર પોલીસ શોધી રહી હતી, જેની જાણ સુરત પોલીસને કરાતા બંનેને પકડીને બેંગલોર પોલીસને સોંપી દેવાયા હતા.

ઉલ્લેખનીય છે કે ,પાવર બેંક અને ઈઝેડ પ્લાન નામની બે ચાઈનીઝ એપ દ્વારા બેંગલોર, દિલ્હી, ઉત્તરાખંડ તેમજ દેશના અલગ-અલગ હિસ્સામાં લોકોને રુપિયા ડબલ કરવાની લાલચ આપીને 520 કરોડ જેટલી માતબર રકમ એકત્ર કરાઈ હતી. આ મામલે દિલ્હી પોલીસ દ્વારા કુલ 11 કૌભાંડીઓની ધરપકડ કરવામાં આવી હતી. તપાસમાં એવું બહાર આવ્યું હતું કે, એપ દ્વારા માત્ર બે જ મહિનામાં આ સમગ્ર કૌભાંડને અંજામ અપાયો હતો.

વધુમાં ,લગભગ પાંચ લાખ લોકો પાસેથી પડાવાયેલી 520 કરોડની રકમને ટ્રાન્સફર કરવા માટે કૌભાંડીઓએ બે બોગસ કંપનીઓ ઉભી કરી હતી. જેના અકાઉન્ટમાં આ નાણાં જમા થતા હતા. ત્યાર પછી તેમના અકાઉન્ટમાંથી રુપિયા કૌભાંડીઓના અકાઉન્ટમાં ટ્રાન્સફર કરવામાં આવતા હતા. દિલ્હી ઉપરાંત આ મામલે બેંગલોરમાં પણ ગુનો નોંધાયો હતો, જેની તપાસમાં સુરતના બે લોકોના નામ ખૂલ્યા હતા.

 74 ,  1