વડોદરામાં આવાસ માટે રસ્તે રઝળ્યા લોકો, ધક્કામુક્કી થતાં પોલીસ દોડતી થઇ..

દીવાલો કૂદી કૂદીને લોકો અંદર ઘૂસી ગયા 

વડોદરા મહાનગર પાલિકા દ્વારા પ્રધાનમંત્રી આવાસ યોજના હેઠળ આવાસ યોજનાના ફોર્મ લેવા માટે અરજદારો ઉમટી પડતા ધક્કા-મુક્કીના દ્રશ્યો સર્જાયા હતા. રાવપુરા પોલીસે ઘટનાસ્થળે પહોંચી મામલો સંભાળ્યો હતો. રાવપુરા આવાસ યોજનાની ઓફિસ ખાતે આજે ભારે ધમાચકડી થઈ જેમા રાતથી ઉભેલા લોકો અકળાઈ ગયા હતા. જેથી તેઓ દિવાલ કૂદ કૂદીને અંદર ઘૂસી ગયા. ટોકન આપીને ફોર્મ વિતરણ શરૂ કરવામાં આવ્યું હતું પરંતુ તેમ છતા લોકોએ પડાપડી કરી હતી. 

વડોદરાના રાવપુરા વિસ્તારમાં આવાસ યોજનાની ઓફિસ આવેલી છે, જ્યાં પ્રધાનમંત્રી આવાસ યોજનાના ફોર્મ આપવામાં આવી રહ્યાં છે. EWS ના આવાસની નવી સ્કીમ મુકાઈ છે. 5 લાખ 50 હજારમા એક રૂમ રસોડાનુ મકાન મેળવવા લોકોનો ભારે ધસારો જોવા મળ્યો. સાડા પાંચ લાખ રૂપિયામાં મકાન લેવા માટે મંગળવારની રાતથી જ લોકો લાંબી લાઈનો લગાવીને બેસ્યા છે. એક દિવસની રજા બાદ આજે પણ ફોર્મ મેળવવા ભારે ધસારો જોવા મળ્યો હતો. ત્યારે લોકોની ભારે ભીડ થતા પોલીસ બોલાવવી પડી હતી. આ દરમિયાન લોકોમાં ભારે ધક્કામુક્કી થઈ હતી. આ ધક્કામુક્કીમાં લોકોની હાલત ખરાબ થઈ હતી. અનેક લોકોના જીવ જઈ શકે તેવી સ્થિતિ બની હતી. તો ધક્કામાં વચ્ચે આવેલા લોકોની કેટલાક લોકોની તબિયત પણ બગડી હતી. ધક્કામુક્કીમાં કેટલાક લોકોને ઈજા પહોંચી હતી. ટોળામાં વિખેરાયેલા અનેક લોકો રડી પડ્યા હતા. 

આ ધક્કામુક્કીમાં લોકો એકબીજા પર પડ્યા હતા. અનેક લોકોના કપડા વિખેરાયા હતા, તો કેટલાકના ચપ્પલ-જૂતા ચોરાયા હતા. તો અનેક લોકોના પર્સમાંથી વસ્તુઓ ચોરાઈ, તો કેટલાકના મોબાઈલ ચોરાયા હતા. આવાસ યોજનામાં ફોર્મ મેળવવા માટે લોકોએ મોટો હોબાળો કર્યો હતો. ભારે ભીડે પોલીસને પણ ધક્કે ચઢાવી હતી. એક બહેને કહ્યુ હતું કે, આખી રાતથી અહી બેસી છું, ધક્કા મુક્કીમાં મને કંઈક થઈ જશે તેવુ લાગ્યુ હતું. હું તો લોકોની વચ્ચે દબાઈ ગઈ હતી. 

ફોર્મ વિતરણ કામગીરી બંધ

ધક્કામુક્કીની ઘટના બાદ મ્યુનિસિપલ કમિશ્નર શાલિની અગ્રવાલે ફોર્મ વિતરણ કામગીરી બંધ કરાવી હતી. તેમણે જાહેરાત કરી હતી કે, આગળનો નિર્ણય પછી લેવાશે. હવે વોર્ડ ઓફિસથી જ ફોર્મ વિતરણ થઈ શકે છે. ત્યારે કોર્પોરેશનના આ નિર્ણયથી મોડી રાતથી લાઈનમાં ઉભા રહેલા હજ્જારો લોકો વિલાયેલા મોઢે પરત ફર્યા હતા. વડોદરા કોર્પોરેશન તંત્રનો અણધડ વહીવટ સામે આવ્યો હતો.

લોકો ઘર વિહોણા બન્યા છે – કોંગ્રેસ

તો બીજી તરફ, આ મુદ્દાને લઈને કોંગ્રેસના નેતા અમી રાવત અને નરેન્દ્ર રાવતે કહ્યું કે, લોકો ઘર માટે પડાપડી કરી રહ્યા છે, પાલિકાનું અણધડ આયોજન સામે આવ્યું છે. મેયર અને મ્યુનિ કમિશનરે સ્થળ પર આવવી લોકોની સમસ્યા દૂર કરવી જોઈએ. લોકોને ફોર્મ ભરવા માટે સમય વધારી આપવો જોઈએ. કોર્પોરેશનની વોર્ડ ઓફિસથી ફોર્મ વિતરણ કરવું જોઈએ, જેથી ભીડ નહિ થાય. વડોદરામાં 10 હજાર મકાનો હજી બન્યા નથી, જેથી લોકો ઘર વિહોણા બન્યા છે. 

 40 ,  1 

Net Dakiya News © 2019, All Rights Reserved

ગુજરાતી