બોલો, આ વાઇરસ પણ ગજબ છે, એન્ટીબોડીને પણ છેતરી જાય છે…!

સંશોધનમાં ખુલાસો થયો કે વાઇરસ એક રૂપ અનેક.. કઇ રીતે બચીશું..?!

અમદાવાદના ચીફ ફાયર ઓફિસર રાજેશ ભટ્ટ એવું માનતા હતાં કે તેમને એકવાર કોરોના થયો છે તો હવે ફરી સંક્રમણ નહીં થાય જોકે તેમની માન્યતાનો આ પરપોટો ત્યારે ફૂટી ગયો જ્યારે કોરોનાથી રિકવર થયાના 30 દિવસ પછી ફરી તેમને વાયરસે જકડી લીધા અને આ વખતે તો કંઈક વધારે જ હાવી થયો જેમાં તેમને 13 દિવસ સુધી હોસ્પિટલમાં દાખલ થવું પડ્યું હતું. જ્યારે પહેલીવાર તેમને કોરોના સંક્રમણ થયું ત્યારે તેઓ ઘરમાં જ ક્વોરન્ટીન થયા હતા અને તેમને સારું થઈ ગયું હતું. જે બાદ તેઓ એવું માની રહ્યા હતાં કે હવે તો તેમનામાં રોગપ્રતિકારક શક્તિ એટલે કે કોરોના સામે લડી શકે તેવા એન્ટિબોડી આવી ગયા છે તો ચિંતાનું કારણ નથી. પરંતુ બીજી વાર જ્યારે કોરોના થયો ત્યારે તેમના ફેંફસામાં ખૂબ જ વધારે ઇન્ફેક્શન જોવા મળ્યું હતું.

જોકે આ પહેલો એવો કેસ નથી ગુજરાતમાં જુદી જુદી જગ્યાએ આવે કેસ મળ્યા છે જેમાં એકવાર કોરોનાથી સ્વસ્થ થયા પછી કે રસી લઈ લીધા પછી પણ લોકોને ફરીથી કોરોના ઇન્ફેક્શન થતા નાગરિકો આશ્ચર્યમાં પડ્યા છે. જોકે આ રીતે જેમને કોરોના સંક્રમણ થાય છે તેમાં મોટાભાગે મહામારીના હળવા લક્ષણો જોવા મળે છે અને તેઓ જલ્દીથી ફરી સ્વસ્થ થઈ શકે છે. જોકે એકવાર રોગપ્રતિકારક શક્તિ વિકસિત થયા પછી પણ આવું થવા પાછળનું કારણ જાણવા માટે ગુજરાત બાયોટેક્નોલોજી રિસર્ચ સેન્ટરની ટીમ દ્વારા જે સંશોધન કરવામાં આવ્યું તેમાં આપણને વિચારતા કરી મૂકે તેવા પરિણામ જોવા મળ્યા છે.

આ સંશોધનમાં જોવા મળ્યું કે કોરોનાનો B.1.167.2 જેને હવે ડેલ્ટા વેરિયન્ટ એવું નામ આપવામાં આવ્યું છે તેણે પોતાના મૂળ સ્વરુપમાં કેટલાક ફેરફાર કર્યા છે જેના કારણે એન્ટિબોડી તેને ઓળખી શકતા નથી અને શરીરમાં દાખલ થયા પછી આસાનીથી એન્ટિબોડીને ચકમો આપીને પોતાનું કામકાજ આરંભી દે છે.

કોરોના વાયરસના આ વેરિયન્ટમાં તેના સ્પાઇક પ્રોટીનમાં E156G અને Arg158 તેમજ Phe-157/del ફેરફાર થયા છે જેના કારણે વુહાનમાં મળી આવેલા પહેલા કોરોના વાયરસ કરતા તેના જેનોમ સિક્વન્સ બદલાઈ ગા છે જેથી એન્ટિબોડી આ વાયરસને ઓળખવામાં થાપ ખાઈ જાય છે.

આ સંશોધનમાં સામે આવ્યું કે કોરોના વાયરસના ડેલ્ટા વેરિયન્ટમાં Arg158 તેમજ Phe-157/del નામના એમિનો એસિડ ગાયબ છે અને તેના સ્પાઈક પ્રોટીનમાં E156G માં મ્યુટેશન જોવા મળ્યું છે. જેના કારણે જ્યારે આ વાયરસ શરીરમાં પ્રવેશ કરે છે ત્યારે શરીરમાં રહેલા એન્ટિબોડીની મેમરીમાં આવા કોઈ વાયરસ અંગે માહિતી હોતી નથી જેથી તે તેના પર હુમલો કરીને નાશ કરતા નથી આ રીતે વાયરસ આસાનીથી બચી જાય છે.

કોરોના સંક્રમણને કાબૂમાં રાખવા માટે સંશોધકોએ વધારે સારી રીતે વાયરસના જેનોમિક સિક્વન્સમાં આવતાં ફેરફાર, વાયરલેન્સ અને બદલાયેલી એન્ટિજેન્સિટી અંગે મોનિટરિંગ પર ભાર મૂક્યો છે. મહત્વનું છે કે રાજ્ય સરકારે હાલમાં જ કોરોનાની સંભવીત ત્રીજી લહેરને ધ્યાને રાખીને કહ્યું કે રાજ્યમાં પ્રત્યેક મહિનામાં વાયરસના જેનોમિક સિક્વન્સિંગમાં થતાં ફેરફાર પર મોનિટરિંગ માટે 1000 સેમ્પલનો અભ્યાસ કરવામાં આવશે.

 86 ,  1