ધો. 10ની બોર્ડ પરીક્ષા રદ્દ કરો- વિદ્યાર્થીઓની માંગણી અને લાગણી…

હાલમાં પરીક્ષા લેવાય તો ગુજરાતમાં 12 લાખ વિદ્યાર્થીઓનું આરોગ્ય જોખમમાં મૂકાઇ શકે..

આ વર્ષે ધોરણ 10માં 12 લાખથી વધુ વિદ્યાર્થીઓ પરીક્ષા આપવાના છે. એક તરફ સેન્ટ્રેલ બોર્ડ ઓફ સેકન્ડરી એજ્યુકેશન (CBSE) દ્વારા દસમાના વિદ્યાર્થીઓ માટે બોર્ડની પરીક્ષા રદ્દ કરવામાં આવી છે ત્યારે રાજ્ય સરકાર આનાથી વિપરીત વર્તી રહી છે.

ધોરણ 10ની પરીક્ષા રદ્દ થવી જોઈએ કે નહીં તે અંગે વિદ્યાર્થીઓએ પણ પોતાનો અભિપ્રાય રજૂ કર્યો છે. માઉન્ટ કાર્મેલ હાઈસ્કૂલમાં દસમા ધોરણમાં ભણતી વિદ્યાર્થિની વિહા દેસાઈએ કહ્યું, “ગુજરાતની પરિસ્થિતિ દિવસે ને દિવસે વણસી રહી છે. પરીક્ષા વારંવાર પાછી ઠેલવાથી વિદ્યાર્થીઓમાં તણાવ ઓર વધે છે. અમારી સ્કૂલના શિક્ષકોએ અમને પરીક્ષા માટે સારી રીતે તૈયાર કર્યા છે. હું એપ્રિલ 2020થી બોર્ડની પરીક્ષા માટે તૈયારી કરી રહી છું અને મેં મારી એકમ કસોટી અને પ્રી-બોર્ડ એક્ઝામમાં સારો દેખાવ કર્યો હતો. હું પરીક્ષા આપવાથી ડરતી નથી પરંતુ આ સ્થિતિમાં ઘરની બહાર નીકળવાની બીક લાગે છે. જૂન મહિનાની ભારે ગરમીમાં બે માસ્ક પહેરીને પરીક્ષા આપવાની અપેક્ષા 15 વર્ષના વિદ્યાર્થી પાસેથી કોઈ કેવી રીતે રાખી શકે?”

સંત કબીર સ્કૂલમાં ધોરણ 10માં અભ્યાસ કરતી વિદ્યાર્થિની વિશ્વા પટેલે કહ્યું, “બોર્ડની પરીક્ષા ઓફલાઈન ના યોજાવી જોઈએ કારણકે હાલ સ્વાસ્થ્ય વધુ અગત્યનું છે. એક જ પરીક્ષા ખંડમાં મોટી સંખ્યામાં વિદ્યાર્થીઓ એકઠા થાય ત્યારે રિસ્ક પણ વધી શકે છે. બધી જ સ્કૂલોએ પ્રી-બોર્ડ એક્ઝામ લીધેલી છે માટે આ પરીક્ષાઓને આધારે વિદ્યાર્થીઓનું મૂલ્યાંકન કરવામાં સહેજ પણ તકલીફ નહીં આવે. જો મે મહિનામાં કેસ અડધા થશે તો સરકાર પરીક્ષાઓ લેશે?”

લોયલા હોલ સ્થિત સેન્ટ ઝેવિયર્સના ધોરણ 10ના વિદ્યાર્થી ક્રીસ બિજોયે કહ્યું, “આ મહામારી દરમિયાન બોર્ડની પરીક્ષા ઓફલાઈન લેવી હિતાવહ નથી. વિદ્યાર્થીઓની સુરક્ષા જોખમાઈ શકે છે. જો સંભવ હોય તો ઓનલાઈન વિદ્યાર્થીઓની MCQ પ્રકારની ઓબ્જેક્ટિવ પરીક્ષા લેવી જોઈએ. પરિણામ આ MCQ પરીક્ષામાં મેળવેલા માર્ક અને આંતરિક મૂલ્યાંકન દ્વારા તૈયાર કરવું જોઈએ.”

ડિવાઈન લાઈફ સ્કૂલના દસમાના વિદ્યાર્થી નિમિત દેસાઈએ કહ્યું, “હાલની પરિસ્થિતિને જોતાં તો સરકારે બોર્ડની પરીક્ષા રદ્દ જ કરી દેવી જોઈએ. પરીક્ષા આપનારા વિદ્યાર્થીઓની સંખ્યા જુઓ અને તેની સામે તોળાઈ રહેલા જોખમ વિશે વિચારો. વિદ્યાર્થીઓ સુપરસ્પ્રેડર બની શકે છે. જો સરકાર પરીક્ષા રદ્દ કરીને માસ પ્રમોશન આપી દે તો અમે આગામી ધોરણની તૈયારી કરી શકીએ છીએ.”

“જે-તે ક્ષેત્રે કરિયર બનાવવા માટે ધોરણ 11ને પાયારૂપ વર્ષ કહી શકાય. બોર્ડની પરીક્ષા પાછી ઠેલાવાના કારણે વિદ્યાર્થીઓને પાછળથી ધોરણ 12ની બોર્ડની પરીક્ષા માટે પણ પૂરતો સમય નહીં મળે. જેના કારણે ટૂંકાગાળામાં અભ્યાસ પૂરો કરવાનું બિનજરૂરી દબાણ વિદ્યાર્થીઓ પર પડશે”, તેમ દિવ્યપથ સ્કૂલના ધોરણ 10ના વિદ્યાર્થી રિષભ શાહે કહ્યું.

સરકારી સૂત્રો પાસેથી મળેલી માહિતી મુજબ, આ સમસ્યા કેટલાક અધિકારીઓ માટે વટની વાત થઈ ગઈ છે. આ અધિકારીઓએ અત્યાર સુધી પોતાના ઉપરીઓને આગ્રહપૂર્વક કહ્યું હતું કે પરીક્ષાઓ યોજાવી જોઈએ અને હવે તેઓ પોતાની વાત પરથી ફરવા માગતા નથી.

 45 ,  1 

રસપ્રદ

રાજકારણ

વ્યાપાર