સેલ્યુટઃ દેશનું ગૌરવ હિમા દાસ…ક્રિકેટરો ,ઢાંકણીમાં પાણી લઇ ડુબી મરો…

12મી જુલાઈના રોજ ફિનલેન્ડના ટેમ્પિયર શહેરના રેટિના સ્ટેડિયમમાં આયોજિત વર્લ્ડ અન્ડર-20 એથ્લેટિક્સ સ્પર્ધામાં મહિલાઓની 400 મીટર દોડમાં બંદૂકમાંથી ગોળી છૂટે એમ દોડી 51.46 સેકન્ડમાં દોડ પુરી કરી સુવર્ણચંદ્રક મેળવનારી હિમા દાસનો 20 દિવસમાં આ પાંચમો ગોલ્ડ મેડલ હતો.

દીકરીની આ સિદ્ધિનો પ્રતિભાવ આપતા હિમાના પિતા રંજીતદાસે મીડિયાને કહ્યું કે હું ‘ને મારી પત્ની જોનાલી ગઈ રાત્રે ઊંઘી શક્યા ન હતા. કારણકે અમને ચિંતા હતી કે હિમાની સફળતા બાદ અભિનંદન આપવા આવનારાઓને અમે પૂરતું ભોજન આપી શકીશું કે નહીં..? શાકભાજી તો ખૂટી નહીં પડે ને. ? આવા સાધારણ પરિવારની દીકરીની ઉદારતા તો જુઓ… પોતાને મળેલ ગોલ્ડ મેડલ રાશિમાંથી અડધી રાશિ તેને ઓરિસ્સાના પૂરપીડિતોના રાહત ફંડમાં આપી દીધી હતી.

આસામના નાગાંવ જિલ્લાના ઢીંગ ગામની રહેવાસી હિમા દાસનો જન્મ 9 જાન્યુઆરી, 2000ના રોજ થયો હતો. આસામના ડાંગરના ખેતરમાં મજૂરી કામ કરતા પિતા 6 વીઘા જમીનમાં 6 જણાના પરિવારનું ગુજરાન ચલાવે છે.

આમ, એક સાવ સામાન્ય ખેડૂત પરિવારમાં જન્મેલી અને કાદવ-કીચડમાં ફૂટબોલ રમનારી હિમા પાસે બે વર્ષ પહેલાં સુધી રેસિંગ ટ્રેકમાં દોડવા માટે સારા બુટ પણ ન હતા. આજે એડિડાસ જેવી પ્રખ્યાત સૂઝ કંપની હિમાને પોતાની બ્રાન્ડ એમ્બેસેડર બનાવી આનંદ અનુભવી રહી છે.

નાનપણમાં ગામના નદી-નાળા, ખેતરો-જંગલોમાં હરણીની જેમ ઉછળ-કૂદ કરનારી હિમા દાસ વાતો કરતી હતી.ત્યારે નાનપણમાં કાદવમાં ફૂટબોલ રમતી હિમાને એક એથ્લેટિક્સ કોચ જોઈ ગયા હતાં. તેમણે હિમાને રમતમાં આગળ વધવા કહ્યું હતું.અને તેના માતા-પિતાને પણ હિમાને આગળ ધપાવવા જણાવ્યું હતું. પરંતુ માતા-પિતાની ઈચ્છા ન હતી. દીકરી સગીર હતી અને એથ્લેટિક્સની તાલીમ માટે છેક ગુવાહાટી જવું પડે, જે 150 કિ.મી દૂર હતું. છતાં કોચ માતા-પિતાને સમજાવવામાં સફળ રહ્યા હતાં.

ગુવાહાટીમાં નિયોનદાસ નામના એક કોચ સાથે હિમાનો પરિચય થયો હતો.અસલી હીરાના પારખુ એવા આ કોચને ખ્યાલ હતો કે હિમાની ખરી દોડ અંતિમ 80 મીટરમાં જ શરૂ થાય છે. કોચે હિમાનું હીર પારખી તેને ગુવાહાટી માં ભાડાનું મકાન અપાવ્યું હતું. અને એમ ગુવાહાટીમાં હિમાની તાલીમ શરૂ થઈ હતી.સાવ સસ્તા સૂઝ પહેરીને હિમાએ જિલ્લા કક્ષાએ 100 અને 200 મીટર રેસ જીતી ત્યારે કોચ નિયોનદાસ દંગ રહી ગયા હતાં.

સૌ પ્રથમ માર્ચમાં યોજાયેલી ફેડરેશન કપ સ્પર્ધામાં 400 મીટર રેસમાં હિમાએ ગોલ્ડ મેડલ જીત્યો હતો. એ સાથે જ કોમનવેલ્થ ગેમ્સ માટે ક્વોલિફાઇ થઈ હતી. કોમનવેલ્થ ગેમ્સમાં તેણે 51.32 સેકન્ડ સમય નોંધાવ્યો જે વાસ્તવમાં એ સ્પર્ધામાં ભારતનો અન્ડર-20 વિક્રમ બની ગયો હતો. કોમનવેલ્થ ગેમ્સમાં તે 400 મીટરની ફાઇનલમાં આવી અને 6ઠ્ઠા ક્રમે આવી હતી.

હાલમાં જ ગુવાહાટીમાં રમાઈ ગયેલી નેશનલ આંતર-રાજ્ય સ્પર્ધામાં ગોલ્ડ મેડલ જીતી એ ઇન્ડોનેશિયામાં ઓગસ્ટમાં રમાનાર એશિયન ગેમ્સ માટે ક્વોલિફાય થઈ છે. હિમાએ ફક્ત 20 દિવસમાં જ કુલ પાંચ ગોલ્ડ મેડલ જીત્યા છે, જે એક અનોખી સિદ્ધિ છે.

તેની આ સિદ્ધિ બદલ રાષ્ટ્રપતિ, વડાપ્રધાન, અમિતાભ બચ્ચન, સચિન તેંડુલકર સહિતની દેશની ટોચની હસ્તીઓએ તેને અભિનંદન પાઠવ્યા છે.આસામના ડાંગરના ખેતરોમાંથી સીધી ગોલ્ડ મેડલ સુધી પહોંચી જનારી આ ઉડન પરીએ જ્યારે ગોલ્ડ મેડલ મેળવ્યો હતો. ત્યારે લાઈટ ન હોવાથી તેનો પરિવાર એ મેડલ સેરેમની જોઈ શક્યો ન હતો. આ કેવી કરૂણતા..!

‘હિમા દાસ ગોલ્ડ મેડલ મેળવી મીડિયા સાથે વાત કરી રહી હતી ત્યારે તે ફ્લુઅંટ અંગ્રેજીમાં વાત નહોતી કરી શકી…’ એવું ટ્વીટ જ્યારે ભરતીય એથ્લેટિક્સ ફેડરેશને કર્યું ત્યારે ખૂબ વિવાદ થયો હતો.સોસીયલ મીડિયામાં ફેડરેશનની ઉગ્ર ટીકા થઈ હતી. જેથી ફેડરેશને માફી માગી અને તેની રમતની પ્રશંસા કરી હતી.

ટૂંકમાં, તમે ગમે તેટલા મહાન બની જાઓ છતાં પણ ગરીબી અને પછાતપણાના લીધે લોકોની માનસિકતા બદલાતી નથી… તમારું પછાતપણું તમારો પીછો છોડતું નથી… એ આવી ઘટનાઓથી સાબિત થાય છે.

 112 ,  1 

Net Dakiya News © 2019, All Rights Reserved

ગુજરાતી