દહેગામમાં કરિયાણાની દુકાનમાં થયેલી ચોરીના બે આરોપીઓ ઝડપાયા, ત્રણ ફરાર

રીંગરોડ ખાતે ચોરીનો માલ વેચવા જતા ક્રાઇમ બ્રાન્ચે દબોચી લીધા

દહેગામના જવાહર માર્કેટમાં આવેલ કરિયાણાની દુકાનને નિશાન બનાવી આઇસર ભરી ત્રણ લાખનો માલ સામનની ચોરી કરનાર બે આરોપીઓની અમદાવાદ ક્રાઇમ બ્રાન્ચે ધરપકડ કરી છે. આરોપીઓ રીંગરોડ ખાતે ચોરીનો માલ વેચવા જતા ઝડપાઇ ગયા છે. ચોરીની ઘટનાને અંજામ આપનાર મુખ્ય ત્રણ આરોપીઓ હજુ પણ ફરાર છે.

દહેગામના પોશ ગણાતા અને અતિ ધનાઢ્ય દુકાનો ધરાવતા જવાહર માર્કેટની અંદર આવેલી મહાદેવ ટ્રેડર્સ નામની જથ્થાબંધ કરિયાણાની દુકાનમાં ચોરો ત્રાટક્યા હતા. નવાઈની વાત એ છે કે ચોરો આખી ટ્રક ભરીને માલસામાન ચોરી ગયા ગયા હતા. આ મામલે દેગામ પોલીસે ગુનો નોધી ચોરને ઝડપી પાડવા તજવીજ શરૂ કરી હતી. પ્રાથમિક તપાસમાં ત્રણ લાખથી વધુનો માલ સામાન ચોરાયો હોવાનું જાણવા મળ્યું હતું. ત્યારે આ મામલે ક્રાઇમ બ્રાન્ચે ચોરીનો માલ સામાન વેચવા જતાં બે આરોપીઓની ધપરકડ કરી છે.

ક્રાઇમ બ્રાન્ચને મળેલી બાતમીને આધારે દહેગામ ચોકડી રીંગરોડ નજીક કિસ્મત કાઠીયાવાડી હોટલ પાસેથી આરોપી ભરત જીવાજી ઠાકોર (ઉ.વ 40, ગામ – સાણોદા, નવોનાસ, દહેગામ) અને જીવારામ પકારામ ચૌધરી (ઉ.32, ઠાકોરનાથ રેસીડેન્સી, નાંદોલ રોડ, દહેગામ)ની ધરપકડ કરી હતી.

પૂછપરછમાં આરોપીઓએ કબૂલાત કરી હતી, કે ગત રોજ 18 તારીખે રાત્રીના સમયે દહેગામના જવાહર માર્કેટમાં આવેલ કરિયાણાની દુકાનમાં રાજસ્થાનના પાલી ખાતે રહેતા મુકેશ પુનારામ ચૌધરી, મોડારામ સોલંકી તેમજ અન્ય એક અજાણ્યા ઇસમે તાળા તોડી આઇસર ભરીમ માલ-સામાનની ચોરી કરી હતી.

ત્રણેય આરોપીઓએ દુકાનને ટાર્ગેટ બનાવી લાખોનો માલ સામાન ચોરી કરી હતી. જો કે ચોરી કરેલો માલ સામાન રાખવાની જગ્યા ન મળતા, આરોપી મુકેશે ફોન કરી ઓળખીતા જીવારામ ચૌધરી તથા મિત્ર ભરતજી ઠાકોરને બોલાવી કણભા ખાતે એક સંબંધીના ધરે ઉતાર્યો હતો. જે હાલ ચોરીનો માલ ભરતજી ઠાકોરના સંબંધી પ્રવિણ ઠાકોરના ઘરે પડ્યો છે.

ત્યારે ચોરીનો માલ વેચવા માટે જીવારામ પકારામ ચૌધરી તથા ભરતજી ઠાકોર ગ્રાહકની શોધમાં હતા. આ દરમિયાન ક્રાઇમ બ્રાન્ચે બાતમીને આધારે દહેગામ ચોકડી નજીક કિસ્મત હોટલ પાસેથી ઝડપી લઇ વધુ પૂછપરછ હાથ ધરી છે. જ્યારે ગુનામાં સંડોવાયેલા રાજસ્થાનના પાલી ખાતે રહેતા મુખ્ય બે આરોપીઓ સહિત ત્રણ ફરારને ઝડપી પાડવા ક્રાઇમ બ્રાન્ચે વધુ તજવીજ શરૂ કરી છે.

 17 ,  1 

Net Dakiya News © 2019, All Rights Reserved

ગુજરાતી