Video: ‘પુત્રની કસમ ખાઈને કહો કે ભાજપને વોટ આપ્યો છે, પછી વીજળી આપીશું’

ભાજપના ધારાસભ્યનો વિડિયો સોશિયલ મીડિયામાં વાયરલ

ઉત્તરપ્રદેશના શાહજહાંપુરનો એક વીડિયો સોશિયલ મીડિયા પર વાયરલ થયો છે. વીડિયો મીરાનપુર કટરા વિસ્તારના ભાજપના ધારાસભ્ય વીર વિક્રમ સિંહનો છે. વીડિયોમાં એક ગ્રામીણ તેમની સામે વીજળીની રજુઆત કરે છે. આ સાંભળીને ધારાસભ્યએ કહ્યું કે પહેલા પુત્રની સોગંદ ખાઈને કહો કે મને જ વોટ આપ્યો છે.

વીડિયો પ્રમાણે, ભાજપના ધારાસભ્ય તાજેતરમાં સંપન્ન થયેલા વૃક્ષારોપણ કાર્યક્રમને સંબોધિત કરતી વખતે તે વિસ્તારોમાં કરવામાં આવેલા વિકાસના કાર્યોનો ઉલ્લેખ કરી રહ્યા હતા. તે સમયે એક ગ્રામીણે તેમને લાઈટની સુવિધા કરી આપવાની વાત કહી.

ધારાસભ્યએ ગ્રામીણને કહ્યું કે, તમે ગંગાની તરફ હાથ કરીને અથવા પોતાના દીકરાની કસમ ખાઈને કહો તે તમે મને વોટ આપ્યો છે, તો અમે આજે જ તમારા ઘરે લાઈટ લગાવી દઈશું. અપેક્ષા તેની જ પાસેથી કરવામાં આવે છે જેને તમે કંઈ આપો છો. ફરિયાદ પણ તેને કરો જેને તમે કંઈ આપો. જો તમે મને વોટ આપ્યો હોય તો તમને પૂરો અધિકાર છે.

તેમણે આગળ ગ્રામીણને કહ્યું કે. તમે અમને મૂર્ખ બનાવવાનો પ્રયાસ ના કરો. મારા પિતા ચાર વાર ધારાસભ્ય રહી ચુક્યા છે. પછી હું ધારાસભ્ય બન્યો. દરેક બૂથ પર કોણે વોટ આપ્યો છે, શું તે મને નથી ખબર? જો તમે મને વોટ આપો અને હું તમને લાઈટ ના આપુ તો તમે કહેજો. ધારાસભ્ય વીર વિક્રમ સિંહે આ બાબતે સ્પષ્ટતા આપતા કહ્યું કે, ગ્રામીણ તેને પોતાના ઘરની લાઈટ લગાવવાનું દબાણ કરી રહ્યો હતો. તે લાઈટની કિંમત 10 લાખ રુપિયા છે. સરકારની યોજના અંતર્ગત આ લાઈટ સાર્વજનિક સ્થાનો પર જ લગાવવામાં આવે છે.

 18 ,  1