નવરાત્રીના રંગમાં ભંગ પાડશે વરસાદ?

ખેલૈયાઓને નડશે વરસાદનું વિઘ્ન!, હવામાન વિભાગે કરી આગાહી

આજે નવરાત્રીનો પ્રારંભ થયો છે અને રાજ્યમાં બે વર્ષ પછી ખેલૈયાઓને ગરબા રમવાની તક મળી છે. આવામાં વરસાદ ફરી એકવાર નવરાત્રીના તહેવારમાં વિલન બની શકે છે. હવામાન વિભાગની આગાહી પ્રમાણે રાજ્યના અમદાવાદ, ગાંધીનગર સહિત દક્ષિણ ગુજરાત અને સૌરાષ્ટ્રમાં વરસાદ થવાની આગાહી છે. અરબી સમુદ્રમાં ઉભું થયેલું એન્ટીસાઈક્લોનિક સર્ક્યુલેશનના લીધે વરસાદ થવાની આગાહી છે. આ સર્ક્યુલેશનના લીધે ગુજરાત ઘણાં ભાગોમાંથી ચોમાસું વિદાય લેશે. આ સિવાય રાજસ્થાન, પંજાબ, હરિયાણા, છત્તીસગઢ અને દિલ્હીમાંથી પણ ચોમાસું વિદાય લેશે.

આજે રાજ્યમાં પહેલા નોરતાની સાથે આગામી કલાકોમાં અમદાવાદ, ગાંધીનગર, ખેડા, આણંદ, વડોદરા, ગીર સોમનાથ, અમરેલી, રાજકોટ, નર્મદા, ભરુચ, તાપી, નવસારી, સુરત, ડાંગ, વલસાડ અને દીવ દમણ અને દાદરા અને નગર હવેલીમાં વરસાદ થવાની આગાહી છે. ગઈકાલે પણ અમદાવાદ અને ગાંધીનગર સહિત રાજ્યના ઘણાં ભાગોમાં વરસાદ તૂટી પડ્યો હતો. વરસાદની સાથે 30-40 કિલોમીટરની ઝડપે પવન ફૂંકાવાની પણ સંભાવના વ્યક્ત કરવામાં આવી છે.

રાજ્યમાં આજથી 11મી ઓક્ટોબર સુધી હળવો વરસાદ રહેવાની આગાહી હવામાન વિભાગ દ્વારા વ્યક્ત કરવામાં આવી છે. જોકે, આ પછી ચોમાસું રાજ્યમાંથી ધીમે-ધીમે વિદાય લેશે તેવી પણ સંભાવના વ્યક્ત કરવામાં આવી છે.

આગામી દિવસોમાં સુરત, તાપી, ડાંગ, નવસારી, વલસાડ, ભાવનગર, અમરેલી, રાજકોટ, ગીર સોમનાથ અને દીવમાં વરસાદ થશે. જેમાં 10 અને 11મી તારીખ દરમિયાન અમદાવાદ, ગાંધીનગર, ખેડા, આણંદ, વડોદરા, તાપી, ડાંગ, સુરત, નવસારી, વલસાડ અને સૌરાષ્ટ્રના અમરેલી, રાજકોટ, ગીર સોમનાથ અને દીવમાં વરસાદની આગાહી છે.

 69 ,  3 

Net Dakiya News © 2019, All Rights Reserved

ગુજરાતી